💭حقائق عن التسويق الشبكي [1]
القارئ العزيز نصيحتي ليك
ما تشتغل تسويق شبكي!
دي نصيحتي ليك ....
لو ما بتحب المعط ... ما تقرا الكلام الجايي اكتفي بي نصيحتي دي و خلاص
لكن لو حابي تفهم اكتر واصل
انا اشتغلت في مجال التسويق الشبكي من العام 2009 في معظم الشركات الموجودة في الساحة , حققتا في كمية منها نجاحات انا زاتي ما كنت متخيلها .. ما حقول اسماء الشركات دي تجنبا للتجريم المعلوماتي
ححاول اشرح شرح مبسط باللغة العامية لنظام التسويق الشبكي , هو نظام موضوع بواسطة خبير اقتصادي
اول سمة
من سمات التسويق الشبكي ...
السمة الثالثة
من سمات التسويق الشبكي ...
القروش الداخلاهو اكتر من المارقة منو
(ما تشغل نفسك بتعقيدات مسمى النظام سواء كان ثنائي باينري او مصفوفة او نظام نقاط و ما الى ذلك )
لمن اقول نظام اقتصادي راسك ما يمشي لحاجة معقدة شديد ...
هسي الصندوق البتعملوه انت و اصحابك كل زول يخت خته ده يعتبر نظام اقتصادي القروش الداخلاهو بتساوي القروش المارقة منو
يعني انتو 10 اصحاب كل واحد فيكم دفع 100 جنيه اخر الاسبوع فيكم واحد بيستلم الف جنيه ....
في التسويق الشبكي الوضع بيختلف
على وجه المثال محتاجين يخشو 8 افراد كل واحد فيهم دافع 2500 دولار عشان في واااحد بس يربح 250 دولار
او محتاج تدخل زول دافع 250 دولار عشان تربح عمولة 20 دولار ...الخ
دي اول سمة في التسويق الشبكي
السمة التانية
النظام دة لو ركزتا فيهو اساسا هو ما محتاج لمنتج عشان يشتغل في صورتو المجردة
لما اقول صورتو المجردة دي بقصد بيها قبل (تمثيلية المنتج )
يعني لو اتخيلتو بدون المنتج البتعرضو الشركة بيكون نظام عادي ممكن يشتغل
ولو قارنتا تكلفة انتاج المنتج او القيمة الفعلية للمنتج حتلقى انها ما قريبة نهائيا من المبلغ الانت بتدفعو
في النظام الاقتصادي الطبيعي سعر السلعة دائما بكون عبارة عن تكلفة الانتاج + المنصرفات + هامش الربح ...
غالبا هامش الربح بيتراوح ما بين 10% ل30% اذا ما رفعتا قيمة المنتج مكانيا او زمانيا
ترفع قيمة المنتج زمانيا بالاحتكار ... و مكانيا بانك تمشي تبيعها في دولة او منطقة ما متوفرة فيها السلعة دي بالاسعار دي ... فممكن تربح اكتر من النسب المذكورة اعلاه
يعني مثال على رفع القيمة زمانيا (انك تشتري سكر في وقت الوفرة و تبيعو في وقت العدم بسعر اعلى)
مكانيا ...انك تمشي تجيب بضاعة ملبوسات من مصر مثلا فممكن تبيع بفايدة 500% او يمكن اكتر ...
ما علينا ...
المهم
لمن ترجع لقيمة المنتج مع مراعاة تكلفة انتاجو بتلقى انو مافي اي علاقة .,(بصرف النظر عن انو هو مفيد او ما مفيد )
و في بعض الشركات حلت المشكلة دي بانو رفعت من قيمة المنتج بتاعها جدا مع الحذر و عمل دراسات اقتصادية اقرب لنظام شركات التأمين
مثلا شركات التامين بتخليك تدفع 12000 جنيه تامين لعربيتك ولو حصل ليك حادث اثناء السنة ممكن يعوضوك 20 مليون كمثال
لكن هم عاملين دراسات اقتصادية و عارفين انو مستحيل كل العربات المؤمنة تعمل حوادث في نفس السنة فاكيد جملة الجبايات حتغطي جملة المدفوعات و حتزيد
ف في شركات تسويق شبكي بتقول ليك مثلا تدفع 2500 دولار و تمشي تقعد في فندق في الدولة الفلانية ...و سارية لمدة عام مثلا (زي التامين)
هم مسبقا عارفين انو مستحيل كل الناس دي توفر تكلفة السفر و تمشي في نفس العام ... فبالطريقة دي اتحلت مسالة قيمة المنتج في بعض الشركات....
ف زي ما قلتا ليك نظام التسويق الشبكي اساسا ما محتاج لمنتج
انا بعمل سستم بقول محتاج 8 اشخاص كل واحد يدفع 2500 دولار (الجملة الفين دولار) عشان واحد يربح 250 دولار
بفتعل لي منتج من مافي تكلفتو الحقيقية 50 دولار ... (لاحظ سعر بيعو 250 دولار يعني 4000% فايدة ) و بضيف ال50 دولار دي على ال 250 فبتبقى 300 دولار
يبقا انا شركتي حقول ليك منتجنا بي 300 دولار .. كل 8 يشترو المنتج واحد في الاخير حيربح 250 دولار ... و بي كدا المنتج مجرد تمثيلية.... حتى لو كان مفيد...
واحد من القوانين الاقتصادية المعروفة هي قانون العرض و الطلب ...
نظام التسويق الشبكي بيخالف نظام اقتصادي اساسي و هو نظام العرض و الطلب
طبعا لما تصمم نظام اقتصادي وانت مخالف لقوانين الاقتصاد الاساسية المعروفة ...معناه اكيد حتنهار في الاخر...
انت لما تجي تسجل اشتراكك في اي شركة تسويق شبكي بتشتري عملة الكترونية
سميها رصيد - سميها ايفوتشر - سميها ايبن
بتختلف مسمياتها من شركة للتانية ...
في الاول في كمية من الناس عايزة تخش شركة التسويق الشبكي ...فبكون في طلب عالي على الايفوتشر او الرصيد او الايبن
يعني الناس الجوة الشركة اقل من الناس البرة الشركة...
الناس الجوة الشركة عندهم في حساباتهم رصيد الكتروني (بصرف النظر عن مسماه) عايزين يبيعوه للناس البرة الوافدين للشركة عشان يسجلو بيهو
فبيكون الطلب على الرصيد الالكتروني عالي ... و العرض اقل .. فانسياب الحركة بيكون الى داخل الشركة ..
بل و بالعكس قد يحصل تكدس في الوافدين ..يعني يكون في طلب عالي على الرصيد الالكتروني لدرجة الرصيد الالكتروني الموجود ما يكفيهم ..
الظاهرة دي دايما بتكون في شركات التسويق الالكتروني الناشئة او الجديدة
اول ما السوق يوصل مرحلة الاتزان (يعني الجوة تقريبا بيساوو البرة ) بيكون العرض مساوي للطلب تقريبا و بيكون في هدوء و عدم تكدس لا في الوافدين ولا في الرصيد الالكتروني
تليها مرحلة التشبع بحيث انو الناس الجوة الشركة بقت اكتر من الوافدين ...و عندهم كمية من الرصيد الالكتروني في حساباتهم و لكن ليس هنالك من يشتري ...
هنا بتبدا شركات التسويق الشبكي في حل الازمة بطريقة بتقنعك بانها ( تطوير للسستم الشغالة بيهو الشركة ) مثلا تقنعك بانو الرصيد الالكتروني ممنوع يتباع للسايد لاين ...و يتباع في شبكتك للداون لاين بس بحجة انو دا تشجيع لشبكتك انها تشتغل...
...
و بالمناسبة غالبا يكون مافي قروش بتصل الشركة اساسا ( كلمة شركة دي بتعني الموقع الالكتروني البتخشو بي حسابك و فيهو دعايات و اعلانات و كدة )
ممكن شبكة السودان مثلا تقرر تعمل مكتب (ايجار عادي ما بيخسرهم شي مقابل الدخل الجاييهم) عشان تزيد قناعة الناس بانو دي شركة ذات مقر و مكتب ...
و طبعا في قانون الشركات لما الشركة تكون (محدودة) لو جات عليها اي مطالبات بتتسدد من راس المال الموجود في البنك فقط...لكن الدعاوى القضائية لا تصل لمالك الشركة في ماله الخاص ..
و دة سبب تسمية محدودة ...
محدودة المسؤولية يعني..
فغالبا اصلا القروش بتكون لافة ما بين الناس نفسها ..يعني انت بتدي فلان 2500 دولار عشان يعمل ليك تسجيل بالرصيد الالكتروني الفي حساب فلان ... و هكذا ..
لما الشبكات تصل مرحلة التشبع بتلقى انو القيادات حقينها بدو يمشو بلاد تانية لسة السوق فيها ناشئ و ما وصل مرحلة الاتزان بحجة (نشر الشغل على نطاق اوسع )و لكن الحقيقة هي هروب من منطقة التشبع
و في بعض القيادات بيمشو يكونو شركات تسويق شبكي جديدة باسماء مختلفة و منتجات مختلفة ...عشان يبدو من مرحلة النشأة و السوق فاضي ... ربحيتهم في الشركة الجديدة يغطو بيها جزء من المطالبات العليهم في الشركة القديمة..
..
...
المهم نرجع لشركتنا القديمة... بعد فترة بتلقى حصل تكدس و كمية من الناس الموجودة في الشركة ساخطة و حانقة على الشركة ....و غالبا هم حديثي الدخول اصحاب الطبقة السفلى ...
بيكون رد فعل الطبقات العليا انو (انتو ما اشتغلتو فاكيد حتفشلو...نحنا نجحنا وانتو لو اشتغلتو زينا حتنجحو )
الا ان الوضع بالنسبة ليهم يختلف ...هم دخلو في زمن التشبع فمستحيل يحققو نجاح الا لو مشو دولة تانية ...
السمة الرابعة
معظم قيادات التسويق الشبكي بعانو ضغط نفسي هائل من المطالبات العليهم ...لكن لو ظهرت الحاجة دي فيهم طبعا باعتبارهم وقعو و كل التحتهم حيفقدو الثقة فيهم
فممكن تلقى القائد مفتوح فيهو 20 بلاغ و مطالب ماليا ...
لكن لازم يحافظ على الصورة العامة و يكون راكب عربية سمحة ولابس بدلة و شايل تاب كبييييير بيعرض بيهو البريزنتيشن و ممكن يستلف قروش عشان يعمل ليك البريزنتيشن في مكان فاخر ...لانو لو انقطع الساين اب ... ف يومهم ابيض ..
لازم الساين اب sign uppما ينقطع ..(الساين اب دي عملية شراء الرصيد الالكتروني بغرض تسجيل عضوية )
فلازم يواصلوا يبثوا الروح المعنوية العالية لكل التحتهم ...
انت لما تخش و تكون جديد يعني ليك سنتين او تلاته سنة تسويق شبكي ما بتكون عارف الحاجات دي ...
لحدي ما يبقى عندك شبكة كبيرة شديد و فيها الاف ... بتتضح ليك الحقائق دي و بتكون بعد كدة (الاتبلا يعوم ) و بقعدوك عديييييييل ..
يا باشا انت عندك شبكة فيها الف زول ..لو استسلمتا او اظهرتا ضعف او عرفو انو الامور جاطت كلهم حيطالبو بقروشهم في وقت واحد وانت حتروح فيها ...
فبتقوم تتضطر تبقا زيهم و تستعمل عبارات (البزنس وااو) ..و تحافظ على الصورة العامة بتاعتك
تخريمة : صحبك الهسي بيدعيك و بيحاول يقنعك اوعك تفتكر انو هو عارف الحقائق دي و بحاول يغشك ... لا هو بجد داير ليك الخير و هو يوميا بيشوف ناس بتكسب و بتستلم قروش .. وهو زاتو حاليا بكون بيكسب قروش و فعلا عاوزك انت تستفيد معاهو ... فما تتخيل انو هو بحاول يغشك ...بس هو لسة ما شاف الصورة الكاملة و ما (اتبلا عشان يعوم )
السمة الخامسة
ممكن تربح على فكرة ... و ممكن حولك ناس معاك يربحو .... و ممكن تشوف كمية من الناس استلمو قروش و حياتهم اتصلحت ...بس سرعان ما حتصل الشركة مرحلة التشبع و تتقلب الامور و الحال يتبدل
فلو يوم شفتا زول سلموهو قدامك ربح 20 الف دولار مااااا تتخيل انو دي تمثيلية ..لا ..
عادي ممكن يكون حقيقة و بالمناسبة ممكن تربح اكتر من كدة ... و ممكن حالك يتبدل لفترة عدييييييل
لكن اول ما توصل الشركة مرحلة العجز و التشبع حتبدا المطالبات عليك تتراكم و حتكون مطالبات باكتر من الشي الانت ربحتو بي كتير .....
مرحلة التشبع و العجز دي بتختلف من شركة لشركة ...بتتراوح من 4 سنين ل 200 سنة في بعض الشركات .. و ممكن بتطوير نظامها الاقتصادي تزيد الفترة دي شوية
السمة السادسة
طبعا كل مشكلة ختو ليها حل ...
خبراء النظام ده راعو جدا لمسالة المطالبات دي .. فعشان لما تتراكم عليك المطالبات المسألة ما تستفحل و انت ما تخش السجن و الموضوع ما يتنشر على السوشال ميديا
بتتقال ليك عبارة هي عبارة عن سم مدسوس
*********ادعي دائرة المقربين ليك للبزنس و الناس الانت بالجد عاوز تنفعهم********
لاحظ معاي في اي شركة تسويق شبكي تدخلها اول ناس بتدعيهم هم الناس المقربين جدا ليك امك- ابوك- اخوك-زميلك في الدراسة من مرحلة الاساس المهم شخص علاقتك بيهو شديدة الالتصاق..
القائمة دي طبعا بسموها قائمة
A+
ديل بتبني بيهم اول طبقة من شبكتك
LAYER 1
و طبعا بعدين لمن تصل مرحلة المطالبات الناس دي اكيد ما حتفتح فيك بلاغ و ما حتدخلك السجن..
مستحيل امك تفتح فيك بلاغ عشان 33 مليون و مستحيل صديقك المقرب يفتح فيك بلاغ و مستحيل يكتب فيك بوست يقول فلان صحبي ما اداني قروشي ...
حتى لو شافك كاتب بوست في الفيسبوك بتدعي الناس للشغل ما حيقدر يجي يكتب (لالا ما تخشو معاهو انا خشيت و ما لقيت شي)
بيكون قيمة علاقتو بيك اكبر من المبلغ الدايرو منك ...فبيضطر يسكت....
فغالبا حتحصل ليك زعزعة في اقرب العلاقات بالنسبة ليك و كمية من الناس القريبين حيغيرو نظرتهم ليك...
وما تتفاجا لو في بعض منهم اتجهو لمواجهتك قانونيا ...
طبعا بوست زي دة لو قراهو زول IRR بمعنى زول جديد لسة و ما اتضحت ليهو كل الحقائق دي و هو لسة في مرحلة انو بيستلم ارباح اكيد البوست دة حيثير حفيظتو و حيبدا رحلة الدفاع الهوجاء عن (صناعة التسويق الشبكي ) ف أنا ما حأزعل من اي زول مستجد ياداب ليهو سنتين تلاته تسويق شبكي اكيد حيكون عندو قناعة تامة و شعور تام و صادق بالانتماء لصناعة التسويق الشبكي .. في نقاشاتهم دايما بتلقاهو بستعمل المصطلحات الحفظوها ليهو ( خليك ايجابي - خليك طموح - حتحقق حلمك - سقفك - اهدافك ...الخ ).. دة طبعا لو جا شاكلني على مقالي دة حتكيف منو شديد و ما حآخد الموضوع بيرسونال ... لانو هو صادق في كلامو البواجهني بيهو ( على حسب الهو عارفو لحدي الان ) ....
😱
.
ولو قراهو زول (قيادي) صاحب شبكة كبيرة و ملم بكل التفاصيل اكيد حيعتبرو تهديد لوضعو المالي ....لانو لو الناس بطلت تدفع و تخش هو ما حيقدر يسدد الالتزامات الكتيرة العليهو ... ف ما بستبعد ممكن عادي قيادي كبير يجي يدفع قروش مقابل انو البوست دة يتمسح ...او حتى يحاول يصلني بتهديد..
الجدير بالذكر انو في خلال الدرب دة بتلاقي كمية من الناس البقيفو جمبك و بسندوك سندة جد .... حتى في الاوقات الحالكة رغم انك ما مسؤوليتهم المباشرة...
حبيت اشرح الموضوع شرح بعيد كل البعد عن التعارضات الدينية عشان ما نخش في حتة شيخي و شيخك و مذهبي و مذهبك و الخلافات الممكن تقود النقاش لمنحنى تاني ...
كسرة صغيرة : التسويق الشبكي البتسمعو في محاضرات الدول المتقدمة و البيعتبر احد اقوى الصناعات و البيدرس في الجامعات هو ليس التسويق الشبكي البنتكلم عنو حاليا ده..(منقول)
كسرة صغيرة : التسويق الشبكي البتسمعو في محاضرات الدول المتقدمة و البيعتبر احد اقوى الصناعات و البيدرس في الجامعات هو ليس التسويق الشبكي البنتكلم عنو حاليا ده..(منقول)
تعليقات